Inkwatru jinqala’ bit-tiżwieqa ta’ kuluri li jżejnuh.  Daqstant ieħor, l-edukazzjoni u l-possibilitajiet li joħorgu minnha, jiżdiedu bit-tiżwieq ta’ kulturi differenti li jgħixu flimkien.  Xogħolna fl-edukazzjoni hu li niċċelebraw din id-diversità billi noħolqu ambjent ta’ rispett u nkontru. Fis-sena 2020, l-Istitut għall-Edukazzjoni kien nieda symposium dwar it-tema li minnu kienu ħarġu numru ta’ aspetti li jolqtu fil-laħam il-ħaj dak li qed jiġri fl-iskejjel; l-opportunitajiet u l-isfidi li jippreżentaw ruħhom. Ma xtaqniex li din l-inizjattiva tibqa’ sett ta’ dokumenti fuq l-ixkaffa, imma tkun xprun biex niċċelebraw dak li qed jirnexxielna nagħmlu flimkien, kif ukoll niddiskutu possibiltajiet għal sfidi li jinqalgħu. Dan nixtiequ nagħmluh mal-edukaturi bil-parteċipazzjoni tas-soċjetà ċivili u individwi li jaħdmu bla heda f’dan il-qasam.   

Għaldaqstant, l-għan ta’ dan l-avveniment onlajn, Ħatt-il Ħajt… Għax Jimpurtana huwa biex noħolqu djalogu informali billi niddiskutu b’aktar profondità it-tema tal-Edukazzjoni Multikulturali mil-lenti lokali flimkien mal-mistiednin tagħna. Dawn huma l-President Emeritus Marie-Louise Coleiro Preca, is-Sinjur Robert Cilia u s-Sinjur Omar Rababah li se jkunu qed jaqsmu l-għarfien, u l-ħsibijiet mnaqqxin mill-esperjenzi tagħhom, dwar il-filosofija u l-pedagoġija f’kuntest edukattiv Multikulturali.

Ikklikkja hawn sabiex tkun tista’ issegwi dan l-avveniment nhar l-Erbgħa 8 ta’ Frar mis-6:00pm sas-7:00pm.